Komersio triangular
E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.| Supkategoria di | komersio  |
|---|---|
| Faseta di | trafiko di katibu afrikano |
Komersio triangular òf nabegashon triangular ta un término históriko ku ta referi na tráfiko di merkansia entre tres haf òf region. E ta desaroyá por lo general ora un region ta eksportá rekursonan ku no ta nesesario den e region for di kua su importashonnan prinsipal ta bini. En bes di esei, e rekursonan ta wòrdu eksportá pa un di tres region. Histórikamente, durante e era di barkunan di bela, e rutanan enbolbí tambe a wòrdu formá dor di e fluho di bientu i koriente di laman.
E komersio triangular histórikamente mas signifikante tabata e komersio triangular transatlántiko ku a tuma lugá entre e kontinentenan situá na Oséano Atlántiko: Oropa, Amérika i Afrika entre siglo 17 i siglo 19. Tambe tabata wòrdu referí na dje komo “triángulo di oro”.[1]
Komersio triangular transatlántiko
[editá | editá fuente]Ruta
[editá | editá fuente]
Barkunan tabata bandoná West Oropa, for di hafnan manera Bristol (Reino Uni), Nantes (Fransia) i Vlissingen (Hulanda), kargá prinsipalmente ku arma di kandela, polvo, heru i textil komo nan merkansia di komersio. Na West Afrika, esakinan tabata wòrdu interkambiá ku gobernantenan lokal i komersiantenan di katibu afrikano i árabe pa katibu, oro i marfil. Despues, for di West Afrika barkunan tabata sali ku karga di katibu pa Nort Amérika òf Karibe via e Pasashi Medio. E kondishonnan di e katibunan durante e biahe tabata miserabel i hopi a muri. E katibunan a wòrdu bendí na kontinente merikano komo trahadó di plantashi. For di Nort Amérika i Karibe, e barkunan tabata sali bek pa West Oropa ku produktonan di luho manera suku, rom, koffie, katuna, plata i tabako.
WIC i tráfiko di katibu
[editá | editá fuente]E komersio aki tabata den man di entre otro West Indische Compagnie. Komersio entre Hulanda i mundu atlántiko a keda establesé dor di e gran ofensiva di WIC kontra e podernan ibériko, e poder portugues den e mundu suratlántiko i kontra di Karibe spañó. Despues di a haña un monopolio riba e komersio transatlántiko, WIC a bira e komersiante prinsipal na "Kosta di Oro", kaminda e tabata operá for di Fort Nassau na Ghana. E fòrti tambe tabata wòrdu usá pa e komersio di espesie i marfil. Nort di Kosta di Oro, WIC tabatin lasonan komersial ku Senegal, Gambia i Sierra Leone.
E monopolio di WIC riba e komersio transatlántiko ta wòrdu konsiderá tradishonalmente komo e instrumento prinsipal den e komersio di katibu entre West Afrika i e mundu atlántiko, un di e komponentenan mas importante di e komersio triangular. Fuera di esei, komersiantenan priva tambe tabatin un rol grandi. E komersio di katibu tabata rekerí invershonnan grandi den seguro, kumpra karga, paga nabegante i intermediarionan komersial. Esaki tabata rekerí un ret grandi di ekspertisio i kontaktonan den un área geográfiko amplio. Promé ku e fundashon di WIC na 1621, e komersio di katibu tabata den man di komersiantenan privá; despues di e patente exklusivo di WIC, e periodo di komersio liber aki a pasa pa pasado.
Mira tambe
[editá | editá fuente]Fuente, nota i/òf referensia
|
